| Embaraso i duna yu lechi
di pechu Bo ta deseá di sali na estado? Bo ta na estado? òf bo ta duna yu lechi di pechu? Anto no tur remedi bo por uza. Den e foyeto aki nos ta duna algun informashon tokante di embaraso i dunamentu di yu lechi di pechu. Tambe nos ta duna algun konseho relashoná ku uso di remedi durante di e período aki. Si bo dòkter skirbi un remedi pa bo òf si bo mes kier kumpra un remedi na botica, kòrda avisá ku bo ta na estado òf ku bo ta dunando yu lechi di pechu. Bo tin deseo di haña un yu? Algun konseho balioso si bo ta deseá di sali na estado: - Uza tur dia 1 tablèt (0.5 mg) di “Foliumzuur”. Kuminsá kuné asina bo stòp ku uzo di e píldora anti-konseptivo òf kualkier otro anti-konseptivo i sigui uza e tablètnan ounke dura lunanan largu, un aña òf basta mas tantu tempu promé ku realmente bo ta na estado. Ora bo sali na estado bo mester sigui uza e tablètnan di “Foliumzuur” por lo ménos 8 siman mas. Despues ku bo tin 16 siman na estado no ta nesesario mas pa bo uza e tablètnan di “Foliumzuur”. “Foliumzuur” ta redusí e posibilidat pa bo yu nase ku loke nan ta yama na hulandes un “open ruggetje” (“lomba habrí”). Uso di un dosis mas haltu di e tablètnan di “Foliumzuur” (5 mg) ta rekomendabel ora e chèns ta grandi ku bo yu por nase ku “lomba habrí”. - Stòp di huma i stòp di uza alkohòl i kome salú. Si ta posibel no uza remedi mas. - Tin remedi ku por hasi daño promé ku fekundashon. Ehèmpel di esakinan ta Neotigason, Roaccutane, Hydrea i e remedinan (tambe radiashon (“bestraling”)) ku ta wòrdu uzá pa kombatí kanser. Esaki por ta un motibu pa bo dòkter deskonsehá bo di sali na estado for di un luna te ku un sierto kantidat di aña despues ku bo stòp di uza e remedinan aki. Paga tinu: Remedinan (tambe radiashon “(bestraling”)) pa kombatí kanser, e remedinan Sulfasalazine, Proscar, Hydrea i tambe sierto remedinan ku ta wòrdu uzá pa e.o. “body-building” por influenshá fertilidat di un hòmber negativamente. Ademas e remedinan aki por kondusí na desviashonnan ku e yu por nase kuné den kaso ku e hòmber ta uza nan. Ora bo stòp ku uzo di anti-konseptivo por dura basta tempu pa bo sali na estado. Esaki tin di haber ku diferente faktor: - E período di mas fertil serka un hende muhé (esaki ta banda di e momentu ku un webu di e hende muhé ta sali for di e ovario) ta dura apénas un par di dia. Den e período aki e chèns pa sali na estado ta mas grandi. Si bo tin un siklo di menstruashon regular di 28 dia, e ovulashon ta tuma lugá mayoria bia 14 dia despues di e kuminsamentu di e último menstruashon. - Si bo tin poko tempu ku bo a stòp ku uzo di e píldora anti-konseptivo, ta eksistí e posi- bilidat ku durante di algun luna e ovulashon no ta sosodé di un forma regular. Esaki ta pa motibu ku bo kurpa tin mester di tempu pa adaptá su mes na e kambio. - Edat tambe ta hunga un ròl. Sigun bo ta bira grandi e fertilidat natural ta bira ménos. - Finalmente faktornan di índole médiko tambe por hunga un ròl importante den salimentu na estado si òf nò. Mi ta na estado ? Dor di fekundashon e kurpa di un hende muhé ta produsí sierto sustansianan ku tin komo meta konservá e embaraso. Un di e sustansianan aki ta HCG ku por keda demostrá den urina di e hende muhé. Tur tèst pa proba embaraso ta basá riba demostrá ku tin HCG den urina. Ta mihó uza urina di mainta trempan, pasobra esaki ta kontené mas HCG. Pa mayoria di e tèstnan pa proba embaraso ta konta ku 2 strepi òf un señal di plùs (+) ta nifiká ku bo ta na estado, miéntras ku 1 strepi òf un señal di men (-) ta nifiká ku bo no ta na estado. Bo mester warda íntimamente 2 minüt riba e resultado, pero no warda mas ku 10 minüt pa bo lesa resultado di e tèst. Konfiabilidat di un tèst pa proba ku bo ta na estado ta mas akseptabel, si bo hasi e promé tèst íntimamente 15 dia despues di e último relashon seksual, apesar ku bo por tabatin bo regla. Despues bo por hasi un di dos tèst un dia despues ku bo no a mira bo siguiente menstruashon. Si tur dos e tèstnan resultá positivo òf si esun promé ta negativo i e di dos positivo, bo mester konsultá bo dòkter di kas ku despues por konfirmá bo embaraso pa medio di un kontròl di sanger. Si tur dos e tèstnan ta negativo òf si esun promé ta positivo i e di dos negativo e chèns ku bo ta na estado ta hopi limitá. Paga tinu: Si bo hasi un tèst di embaraso promé ku e tempu indiká, bo mester tene kuenta ku un resultado positivo e ora ei no ta nifiká tur bia un garantia ku bo ta keda na estado, pasobra hopi embaraso ta kibra promé ku tempu. Un resultado negativo ta posibel tambe ora ku tòg bo ta na estado. Esaki ta nifiká ku bo a hasi e tèst promé ku e ora indiká. E Embaraso - Diferente fase durante embaraso: Fase 1: Formashon di e èmbrio. Na momentu di fekundashon e webu di e hende muhé i e simia di e hende hòmber ta bira unu. Esaki ta sosodé mas o ménos 14 dia despues di e promé dia di e último menstruashon. Seis pa shete dia despues di e fekundashon e webu fekundá ta bai drumi den e matris pa despues sigui desaroyá su mes den un èmbrio. Fase 2: Desaroyo di e èmbrio. E fase aki ta kore di e di 3 te e di 12 siman di embaraso. Den e período aki tur e diferente partinan di kurpa, órganonan, sistema nèrvioso i selebre ta keda formá. E èmbrio ta masha sensitivo pa sustansianan ku por hasi daño den período aki. Si e èmbrio keda afektá den e período aki e por muri òf e yu por nase ku sierto defektonan. Fase 3: Kresementu di feto. E fase di kresementu di e feto ta kore di e di 12 siman te e di 40 siman di embaraso. Prinsipalmente entre e di 12 i e di 16 siman e feto (asina nos ta yama e èmbrio despues di e di 12 siman) ta krese enormemente. E yuchi ku ainda no a nase ta ménos sensitivo pa sustansianan ku por hasi daño durante di e período aki, ku durante e desaroyo den fase 2. Sin embargo tin sierto sustansianan ku por retrasá e kresementu di e yuchi òf tambe kousa daño na e sistema nèrvioso òf órganonan di e yuchi. - Uzo di alkohòl i humamentu durante di embaraso. No ta konsehabel pa un muhé na estado huma ni bebe alkohòl. Un muhé na estado ku ta uza alkohòl ku regularidat ta kore e rísiko ku su yu ta nase promé ku tempu òf tambe ku e yu ta nase ku desabilidatnan mental i desabilidatnan di bista (e asina yamá “foetaal alcoholsyndroom”). Dor di humamentu nikotina i monoksida di karbon (“koolmonoxide”) ta drenta den e sirkulashon di sanger di e yuchi ku no a nase ainda. Esaki ta pone ku e sanger no por transportá sufisiente oksígeno pa e yuchi. Pa tal motibu yunan di mamanan ku ta huma ta proporshonalmente mas chikitu i nan tin tambe un kabes mas chikitu. - Vitamina durante di embaraso. Saliendo for di e punto di bista ku bo ta kome salú i sufisientemente variá, nos por bisa ku generalmente no ta nesesario uza èkstra vitamina durante di embaraso. Un eksepshon riba esaki ta “Foliumzuur” (vitamina B11), manera ya nos a menshoná. Tin hopi tipo di (multi-)vitamina optenibel, den kua bo ta haña “Foliumzuur” kaba. Esakinan ta p.e. Dagravit Totaal, S.S.S., Materna, Trihemic, Fero Folic i Iberet Folic. Uza e diferente (multi-)vitaminanan durante di embaraso únikamente despues di a konsultá ku bo dòkter. Lechi di Pechu - Lechi di pechu i remedi. Lechi di pechu ta masha masha bon pa bo yuchi. Sierto sustansianan den lechi di pechu ta protehá bo yuchi kontra diferente malesa i infekshon. Sin embargo ora bo ta duna bo yu lechi di pechu, bo mester tene kuenta ku eventual remedinan ku abo mes ta uza, por afektá bo yu pa medio di e lechi di pechu ku e ta bebe. Bo igra i bo nirnan ta sòru pa saka sobra di remedinan for di bo kurpa. Igra i nirnan di un yu chikí a krese sufisiente te despues di 6 luna. Pa tal motibu kurpa di bo yuchi ku a kaba di nase no por ainda ku e remedinan ei i no por saka nan afó, loke ta pone ku e remedinan en kuestion por hasi daño. P’esei ta bon pa semper bo konsultá bo dòkter di kas òf tambe bo botica, si ta rekomendabel uza sierto remedinan ora bo ta duna yu lechi di pechu. - Alkohòl i humamentu durante di dunamentu di yu lechi di pechu. Nikotina i alkohòl tambe tin influensia riba lechi di pechu. Humamentu por redusí produkshon di lechi serka un mama. Fuera di esei aparentemente humamentu tin tambe influensia riba e smak i tambe holó di e lechi di pechu, loke ta pone ku e yu ta bebe ménos lechi. Via di lechi di pechu e yu ta haña alkohòl den su kurpa. Ta konsehabel pa sigur no uza alkohòl durante di e 2 promé lunanan ku bo ta duna bo yu lechi di pechu. Despues di esei bo por uza maksimalmente 2 glas di alkohòl 2 pa 3 bia pa siman. Preferiblemente despues ku bo kaba di duna bo yu lechi di pechu pa último bia anochi (a lo ménos si bo no ta sigui duna e yu lechi di pechu durante di anochi). - Vitamina K pa yunan ku ta bebe lechi di pechu. Vitamina K ta un di e diferente vitaminanan. Bo ta haña vitamina K den bèrduranan manera spinazi, tomati i algun sorto di kolo. Vitamina K ta wòrdu trahá tambe den tripanan dor di sierto bakterianan. Vitamina K ta nesesario pa un bon kohamentu di sanger. Falta di e vitamina aki por kondusí na sangramentunan spontáneo, p.e. sangramentu den urina, sangramentu bou di kueru òf den kasonan mas serio, sangramentu den stoma, den tripanan i den selebre. Un yuchi ku ta bebe lechi di pechu no por traha vitamina K ainda den su tripanan i lechi di pechu ta kontené tiki vitamina K. Pa evitá problema ora bo ta duna yu lechi di pechu, bo por duna e yu un tiki vitamina K for di e di 8 dia despues ku el a nase (gota di vitamina K 0,25 mg/g, 3 gota pa dia). Banda di fin di e di 3 luna e yu su tripanan mes por traha vitamina K. Den kuminda di bòter tin sufisiente vitamina K. Pues no ta nesesario duna bo yu èkstra vitamina K si bo ta dun’é kuminda di bòter. Si bo yu ta haña tantu kuminda di bòter komo lechi di pechu, bo tin ku dun’é èkstra vitamina K únikamente si bo ta dun’é ménos ku 400 ml di kuminda di bòter pa dia. Kon pa kuminsá bebe píldora anti-konseptivo despues di a duna lus Ora bo ta duna bo yu lechi di pechu kompleto (bo ta duna bo yu lechi di pechu di dia i anochi ku kada bes ménos di 6 ora di diferensia) sin pèrdèmentu di sanger vaginal, e chèns pa sali na estado ta minimal. Den kaso ku bo ta duna bo yu tantu lechi di pechu komo lechi di bòter bo por kuminsá uza e píldora anti-konseptivo for di 6 siman despues ku bo a duna lus. Bo mester uza un píldora anti-konseptivo di ménos ku 50 mcg di ethinylestradiol manera p.e. Alesse, Microgynon, Nordette i Gynera òf e asina yamá “prik-pil” Depo-Provera. E ora ei bo mester sòru si pa for di 3 siman despues ku bo a duna lus te ora bo kuminsá uza e píldora anti-konseptivo, bo uza un èkstra anti-konseptivo manera p.e. kondon. Un desbentaha ora bo ta uza píldora anti-konseptivo durante ku bo ta duna lechi di pechu ta ku e lechi di pechu por bira ménos. No uza Nordiol, Ovral òf Mesigyna si bo ta duna lechi di pechu. Si bo stòp di duna lechi di pechu si bo por uza Nordiol, Ovral òf Mesigyna. Den kaso ku ta lechi di bòter so bo ta duna bo yu, bo por kuminsá uza e píldora anti-konseptivo for di 3 siman despues ku bo a duna lus. E píldora e ora ei ta konfiabel mesora. Remedi durante di Embaraso i ora bo ta duna lechi di pechu Hopi remedi por hasi daño na e yuchi ku no a nase ainda i tambe na e yu ku ta bebe lechi di pechu. Pa tal motibu preferiblemente no uza remedi durante di embaraso ni tampoko durante di e período ku bo ta duna bo yu lechi di pechu. Sin embargo durante di embaraso ta presentá ku frekuensia algun keho di salú. Mas abou nos ta ofresé bo algun posibilidat ku no ta peligroso ora bo tin e kehonan di salú ya menshoná. Den kaso ku bo ta uza remedi durante e período ku bo ta duna lechi di pechu ta reko- mendabel pa bo uza bo remedinan ora bo kaba di duna bo yu lechi di pechu. Si bo tin ku uza un remedi solamente un bia pa dia, ta mihó bo hasi esaki anochi, anto eventualmente remplasá e kuminda di anochi di bo yu pa lechi na bòter. Kehonan típiko durante di embaraso Sakamentu / Nousia: Hopi hende muhé tin molèster di nousia durante di embaraso, esaki prinsipalmente mainta trempan. Kiko bo mes por hasi? - Kome mainta un buskuchi (“cracker”) riba kama i despues keda drumi un mei ora mas. - Si henter dia bo tin problema ku nousia, ta mihó bo kome mas tantu bia pa dia un tiki na lugá di kome tres bes pa dia e kumindanan prinsipal so. - Kome trankil i sin vèt. - Evitá bebidanan ku gas manera “Cola”, “Sprite”, “Fria”, èts. Si bo tin hopi molèster di nousia durante di embaraso, bo por uza, den konsulta ku bo dòkter, Diphenhydramine (Dramamine òf Gravol). Preferiblemente no uza e remedinan aki miéntras ku bo ta duna lechi di pechu. Será di Kurpa Bo ta haña será di kurpa hopi serka muhénan na estado. Kiko bo mes por hasi? - Un di e kousanan por ta falta di sufisiente moveshon. P’esei ta masha importante pa bo tin sufisiente moveshon durante di bo embaraso. - Sòru tambe pa bo bebe sufisiente líkido. Bebe 1½ pa 2 liter di awa pa dia. - Sòru tambe pa bo kome kuminda ku sufisiente fibra (p.e. pan integral, fruta i bèrdura). Si e tepnan ku nos a duna aki no ta yuda sufisiente i bo tin algun dia kaba sin bai af òf bo tin hopi doló ora bo tin ku bai af, kualke remedi kontra será di kurpa por ta e solushon. Lactulose (Duphalac), Metamucil, Konsyl i Legendal por wòrdu uzá sin problema durante di embaraso òf durante di e período ku bo ta duna lechi di pechu. Ta importante pa durante di uso di Konsyl òf Metamucil, bo bebe 1½ pa 2 liter di awa pa dia. Dulcolax (tablèt òf zetpil) por wòrdu uzá, ora durante di embaraso òf durante di dunamentu di lechi di pechu ningun di e remedinan menshoná aki ariba no resultá efektivo. Pa alivio un baimentu di af ku hopi doló bo por uza Microlax. No uza produktonan di Fleet, Aloë ni Senna durante di embaraso òf dunamentu di lechi di pechu. Kimamentu di stoma Kasi mitar di muhénan na estado ta keha di kimamentu di stoma. Kiko bo mes por hasi? - Evitá kuminda- i bebidanan di kua bo sa di antemano ku nan ta duna bo kimamentu di stoma, manera p.e. kuminda ku hopi speserei, kòfi, apelsina, vèt, bebidanan ku gas i chukulati. - Kome mas tantu bes pa dia un tiki en bes di e tres kumindanan prinsipal so. - Un glas di lechi kayente por yuda. - Den kaso ku ta prinsipalmente anochi bo tin molèster di kimamentu di stoma, ta konsehabel pa, mas o ménos tres ora promé ku bo bai drumi, bo no kome mas. Loke tambe por yuda ta lanta bo kolchon na bo kabes di kama un tiki dor di hinka un kusinchi bou di dje. Si e tepnan aki no ta yuda sufisientemente bo por uza durante di embaraso òf dunamentu di lechi di pechu Antagel òf Maalox. Bo mester uza e remedinan aki ½ te 1 ora despues di kada kuminda i tambe promé ku bo bai drumi. Si bo tin tambe problema ku gas bo por uza remedinan ku simethicon/dimeticon manera Maalox Plùs, Diovol Plùs, Disflatyl i Gas X. No uza e remedinan aki kontra kimamentu di stoma pa mas ku 2 siman. No uza remedinan ku bismuthsubsalicylaat manera p.e. Pepto-bismol, durante di embaraso òf dunamentu di lechi di pechu. Demas kehonan Aki ta sigui un resúmen di e demas kehonan ku por surgi durante di embaraso òf dunamentu di lechi di pechu, kual bo botika por yuda bo kuné. Acne Durante di embaraso òf dunamentu di lechi di pechu bo por sigui uza produktonan ku Benzoylperoxide (Benzac, PanOxyl, Solugel) apliká riba kueru. Produktonan ku Salicylzuur tin mag di keda apliká, durante di embaraso i dunamentu di lechi di pechu, únikamente riba partinan chikí di kueru ku no ta iritá. Remedinan manera Roaccutane (na tablèt), Stievamycin (na “gel”), Cleocin (na “gel” òf likido), Retin A (na krema òf ”gel”) ku ta optenibel únikamente riba resèpt di dòkter no tin mag di wòrdu uzá durante di embaraso. Diarea (habrimentu di barika) Ora bo tin diarea bo ta pèrdè hopi líkido. P’esei ta konsehabel pa bebe hopi líkido, manera awa, te òf djus. Sakunan di ORS i líkido manera Rehidrat i Pedialyte si por keda uzá durante di embaraso i dunamentu di lechi di pechu. Tambe Norit por wòrdu uzá durante di embaraso i dunamentu di lechi di pechu. Si bo kier uza Loperamide durante di embaraso, bo mester konsultá ku bo dòkter, pero e por wòrdu uzá si durante di dunamentu di lechi di pechu. No uza produktonan ku ta kontené bismuthsubsalicylaat. Bo ta haña e sustansia aki den Kaopectate i Pepto-bismol. Wowo kòrá i wowo seku Remedinan ku por wòrdu uzá pa alivio esaki sin problema durante di embaraso i dunamentu di lechi di pechu ta Optrex Wash and Tears, Refresh Tears, Tears Naturale II, Systane i Murine Tears. Kontra wowo kòrá bo por uza Visine, Murine plùs, Optrex medicated i Clear eyes despues di konsulta ku bo dòkter. No lubidá ku despues ku bo uza e remedinan aki bo mester primi, kaminda bo awa di wowo ta kore, sera pa un tres minüt asina ku bo dedenan. Kishikimentu (kurpa ta hinka) Kontra di esaki bo por uza durante di embaraso òf dunamentu di lechi di pechu produktonan ku “menthol”, un “antihistaminicum” òf “lidocaïne” manera Anthisan, Benadryl òf Menthol na puiru. No uza produktonan ku Fenol òf Kamfer manera Humphreys, Caladryl, Lotio Calamina i Prurix. Fèrkout i Grip Fèrkout i grip hopi bia ta bai kompañá ku hopi kehonan manera keintura, doló di kabes, di garganta, di orea i di múskulo i tambe nanishi sera. Ora bo tin keintura i tambe kontra mayoria doló bo por uza Paracetamol (Tylenol, Panadol, Calpol) sin problema durante di embaraso òf dunamentu di lechi di pechu, basta bo no uza nan hopi dia siguí. Uso di Ibuprofen (Advil, Motrin, Brufen), Naproxen (Aleve) i Diclofenac (Cataflam, Voltaren) ta posibel durante di e 5 promé lunanan di embaraso i tambe durante di dunamentu di lechi di pechu, basta esaki ta sosodé de bes en kuando. No uza Ibuprofen, Naproxen òf Diclofenac durante di e tres último lunanan di embaraso. No uza tampoko Mefenaminezuur (Ponstan Forte) ni “Salicylzuur” (Aspirine) durante di embaraso òf dunamentu di lechi di pechu. Doló di orea Si bo ta sinti doló di orea bo por uza, fuera di Paracetamol, tambe Otrivin pa nanishi durante di embaraso i dunamentu di yu lechi di pechu. No uza Otrivin mas ku 5 dia tras di otro. Doló di múskulo Doló di garganta Nanishi será Tosamentu seku (sin sleim)/Tosamentu
ku sleim Paga tinu: Diferente remedi ku na Kòrsou ta
wòrdu uzá kontra keintura, grip, nanishi será
i tosamentu ta kontené mas ku un sustansia ku ta aktivo.
Ehèmpelnan di sustansianan ku ta aktivo ta pseudoephedrine,
chlorfeniramine, fenylefrine, guaifenesine, ephedrine, dextromethorfan
i ammoniumchloride. Bichi Eksema di Piskadó, “Schimmel”
di kueru, “Schimmel” vaginal Algun tep importante |
di
pechu